أستعد لأعمال غنائية ومسرحية جديدة
عبّر الفنان خالد سليم عن سعادته الكبيرة بحضوره مهرجان الجونة السينمائي هذا العام، مؤكدًا حرصه الدائم على متابعة الإنتاج السينمائي المصري والمشاركة في دعم زملائه من الفنانين، لا سيما في الأعمال التي تجمع بين النجوم والوجوه الجديدة.
وقال خالد سليم في حديثه لـ”العين الإخبارية”: “أنا طبعًا موجود عشان أتفرج على فيلم (ولنا في الحب خيال)، وعلى قد ما أنا متابع كل الأفلام في المهرجان، بس الأفلام المصرية بالنسبة لي ليها مكانة خاصة، فضروري أكون متواجد فيها”.
وأضاف: “أحمد السعدني صديق عزيز عليّ جدًا، وميان طبعًا حبيبة قلبي، وكمان في وجوه جديدة هتكون موجودة في الفيلم، والمخرجة كمان وعدتها إني أكون موجود النهارده، فقلت لها حاضر، هكون موجود إن شاء الله، وسعيد جدًا إني هنا وأتمنى الفيلم ده يكون حاجة مهمة في تاريخهم الفني”.
وفي سياق آخر، تحدث خالد سليم عن مشواره الغنائي ونجاح عدد من أغانيه التي لا تزال عالقة في أذهان الجمهور حتى اليوم، قائلًا: “الحمد لله ربنا وفقني في أعمال كتير لسه الناس بتحبها وبتسمعها لغاية النهارده، لأنها أعمال فيها قيمة فنية، أنا دايمًا بحرص إني ما أقدمش حاجة مبتذلة. الأغاني دي ارتبطت بالأفلام اللي شاركت فيها زي السلم والتعبان وسهر الليالي، وده خلّى الناس تحب الأغاني والموسيقى التصويرية وحتى الأبطال والدراما كلها”.
وعن فيلم السلم والتعبان تحديدًا، أبدى خالد سليم حنينه إلى تلك المرحلة من مسيرته، مؤكدًا أن العمل كان محطة مهمة للغاية في بداياته الفنية. وقال: “كنت نفسي جدًا أكون جزء من النسخة الجديدة من السلم والتعبان، لأنها كانت تاني خطوة في حياتي، وخطوة مهمة جدًا، بس لما المشروع بدأ التنفيذ، محبتش أتدخل، قلت لو كانوا عايزيني كانوا هيكلموني، وربنا يوفقهم طبعًا وأنا متشجع أشوف الفيلم”.
وكشف خالد سليم عن عدد من مشاريعه المقبلة، حيث قال: “عندي أغنية جديدة نزلت من حوالي عشرة أيام اسمها ليلة من اللي هيا، وهي ديو مع الفنان عبدالباسط حمودة، وعندي كمان مجموعة من الأغاني السينجل اللي هتنزل واحدة ورا التانية إن شاء الله في الفترة الجاية”.
أما على صعيد المسرح، فقد أشار إلى مشروع جديد يجمعه بعدد من النجوم، موضحًا: “عندي مسرحية غنائية استعراضية كوميدية مع الفنانتين آيتن عامر ووفاء عامر، وإن شاء الله هتتعرض في أكتر من مسرح في الخليج والوطن العربي”، مضيفًا: “كمان عندي أكتر من ترشيح لمسلسلات رمضان، وإن شاء الله قريب جدًا هستقر على واحد منهم”.
واختتم خالد سليم حديثه مؤكدًا أن مشاركته في المهرجانات الفنية جزء من دعمه للسينما المصرية، وأنه يشعر بالفخر بما يقدمه الفنانون الشباب من طاقة جديدة وإبداع متجدد.
aXA6IDQ1LjE0LjIyNS4xMCA= جزيرة ام اند امز
